وماذا عن الجمادات؟!
بتوصل لمرحلة ان علاقتك بالأشياء حواليك أقوي وأعمق بكتير من الناس اللي حواليك ..
علاقتك بمج الشاي الصبح والمعلقة وأنت بتقلب وعلاقتك بحرف المج
وكأنك بتعطيه قُبله الصباح كل يوم مثلا!
وعلاقتك بباب التلاجة وانت واقف تشرب جواها وهو مفتوح بتوصل لمرحلة ان دقايق وهتقوله متشكرين يا ذوق نردهالك في الأفراح
وهووووب تقوم تخبط الباب وتمشي..
وعلاقتك بالدفتر بتاعك اللي بتكتب فيه وقلمك والمكتب اللي زهق من الدق عليه بصوابعك وقت القلق ووقت ما تسرح مثلا
وقاعد تهز الكرسي وتسرح تفتكر انه أصله كان شجرة في غابة ما وتتنمى تكون واقف جنب الشجرة دي وتهرب من كل حاجة وتروح لبعيد, وفجأة مثلا في لحظة زي دي اختك تيجي ترخم عليك ترجع من اللحظة دي وتبطل تهز الكرسي وصوابعك تقف من الدق..
علاقتك بموبايل البلاك بيري كصديق ويومياتك عليه ممكن تبقى أعمق بكتير من أي رسائل بينك وبين أصحابك أو أهلك أو غيرهم ..
وعلاقتك بفرشاة الأسنان أقوى شيء يقدر يخلي وشك يترسم عليه ابتسامه مجهولة المصدر لمجرد انك قررت تغسل أسنانك
أو يمكن شكل المعجون بيضحك؟! يمكن !!
الجمادات من حواليك فيها روح بتدعمك بكل قوة بدون ما تشعر لدرجة انها تستحق ان تكون جديرة بالإحترام والتقدير ولو ببعض من البساطة ..
الجمادات من حواليك أكتر حاجة فيها روح وفيها نبض ومشاعر وأقوى حافز للذاكرة من ناس كتير حواليك ممكن تصاب معاهم بالملل أو الزهق بمحادثة قد تحتوي علي الأتي :
ايه الاخبار؟
الحمد لله بخير
وانت/وأنتِ
الحمد لله
يارب دايما
صمت
صمت
احيانا الواقع بائس وبعض الناس مُملين فعلا بس خليك فاكر انه في الحالة دي أول حاجة بتلاقيها حواليك وتحن لها
هي الجمادات وبتروح الأوضة بتاعتك على سريرك ومخدتك وحواليك الكتب والدفتر والقلم وبتبتدي تكتب وتسمع موسيقى مثلا أو تقرأ حاجة تخرج بها عن الروتين
المُمل في التعامل مع الآخرين..
وبيخرجك من الحالة دي مثلا صديق أو كلمة حلوة من أهلك
أو حد في الشارع مش عارفه أو مفاجأة !
حافظوا على علاقتكم بالجمادات تأملوها حواليكم كلها روح وطاقة على الرغم من السكون والهدوء اللي حواليك
بس مُريحة لدرجة لا توصف..
وحافظوا على علاقتكم بالأشخاص الإيجابيه في حياتكم
وبس :))
ليست هناك تعليقات:
إرسال تعليق