رتوش

بص أصل أنا هحكيلك ركز..
أول خطوة بتبقى حقيقة
طعم الفكرة في حَلقكْ مُر
كتر الدوشة أساسي بيتعب
شعب وطبعه مبيفرحش
حتي الحلم الملموس ضحكة
يصحي ومنه كأنه كابوس
آخرك تعشق مرة كفاية
ومن غير تبديل في مشاعرك
حتي الندهه اللي بصوت بنت
هديت فجأة بحقنة بنج
كتر الرغي بينسج حَلقة
ماتوصَلش لحد البر
طول ما عيونك متغميه
وشايفة غابات..
بردو هتضحك ضحكة اياها
زي برود الجو لوحدك
والحطب المتغذي بشوقك
اصبح مـ البعد مبيدفيش
والشعب اللي لسانه متلجم
وقت ما يفرح فجأة هينزف
ولا يبكيش..

حالة قرف عامة !

حالة قرف عامة 

حالة يأس بزياده

حالة غياب حالة انعدام

حالة فراغ حالة سخافة

حالة قرف عـ الكل 

حالة سكات وضحكة تاجها الدموع

عزيزي المواطن بلاش فرط التفاؤل دا

الله يروق بالك يا عم ..

خليك هادي شوية وخفف 

دي السرعه بـ الرادار متراقبه

خليك أبرد مـ التلج وركز 

عشان تقوى عـ النار اللي جواك

متعقدهاش بقفلة وشك 

مش ناقصك ولا ناقصني كآبتك

دي حالة قرف عامة ..

والدعوة مجاني 

يلا أنا عازمك !